रायगडचे खासदार सुनील तटकरे,महिला व बालविकास मंत्री आदिती तटकरे यांचा बालेकिल्‍ला अशी ओळख असलेल्‍या श्रीवर्धन मतदार संघातील म्हसळा तालुक्यात २ फेब्रुवारी २०२४ रोजी शिवसेना पक्षप्रमुख उद्धव ठाकरे यांची तोफ धडाडणार आहे.रायगड जिल्ह्यातील शिवसेनेचे सर्वच आमदारांनी पक्षांतर केल्याने सेनेत मोठे राजकीय स्थित्यंतर घडून आले आहे.लोकसभेच्या सार्वत्रिक निवडणुका तोंडावर आल्या असल्याने शिवसेना उद्धव ठाकरे गट नव्या जोमाने कामाला लागली आहे.स्वतः पक्ष प्रमुख उद्धव ठाकरे हे जिल्हयातील शिवसैनिकांसोबत संवाद साधण्यासाठी १ आणि २ फेब्रुवारीला रायगड दौऱ्यावर येणार आहेत.दोन फेब्रुवारीला श्रीवर्धन मतदार संघातील म्हसळा शहरात दुपारी तीन वाजता उद्धव ठाकरे यांची जाहीर सभा होणार असल्याची माहिती दक्षिण रायगड जिल्हाप्रमुख अनिल नवगणे यांनी पत्रकार परिषद घेऊन दिली आहे.यामुळे या सभेची जनतेत उत्सुकता आहे.उध्दव ठाकरे यांच्या दौऱ्याची माहिती जास्तीत जास्त जनतेपर्यंत पोहचविण्यासाठी विभागवार बैठका आयोजित करण्यात येत आहेत.उध्दव ठाकरे यांच्या सभेनिमित्त शिवसैनिकांमध्ये उत्साह पसरला आहे.आयोजीत सभेची शिवसैनिकांनी जय्यत तयारी सुरू केली असून प्रत्येक गावागावातून,वाडी वस्त्यांमधून शिवसैनिक मोठ्या संख्येने उपस्थित राहणार असल्याचे नवगणे यांनी सांगितले.यावेळी उपजिल्हा प्रमुख नंदू शिर्के, तालुका प्रमुख सुरेश कुडेकर,संपर्क प्रमुख गजानन शिंदे,बाळा म्हात्रे,दीपल शिर्के,अमित महामुणकर, शौकत हजवाने आदी शिवसैनिक उपस्थित होते.
