सातारा जिल्हा संरक्षण समितीमध्ये माजी सैनिक प्रशांत कदम यांची निवड
(कुलदीप मोहिते, कराड)
सातारा, दि. २३ : संरक्षण समितीमध्ये माजी सैनिक प्रशांत कदम जिल्हाध्यक्ष सैनिक फेडरेशन यांची निवड झाली आहे.आज त्यांना निवडीचे पत्र मेजर आनंद पाथरकर सेना मेडल (नि.) जिल्हा सैनिक कल्याण अधिकारी सातारा यांच्या हस्ते देण्यात आले.
यावेळी बोलतांना कदम म्हणाले की सातारा संरक्षण समिती स्थापन करण्याची मागणी सैनिक फेडरेशनने लावून धरली, अखेर त्याला यश मिळाले़ हा सर्व माजी सैनिकांचा विजय आहे़़ शासनाने सदर समिती स्थापन केल्यामुळे आता आजी-माजी सैनिक,त्यांचे कुटुंबीय,शहीद जवान कुटुंबीयांच्या शासनाकडे प्रलंबित तक्रारी तात्काळ सुटतील व सैनिकांना न्याय मिळणे सोपे होईल, अशा शब्दात प्रशांत कदम यांनी निवड झाल्यानंतर आपल्या भावना व्यक्त केल्या.
जिल्हास्तरीय समिती गठीत करणेबाबत महाराष्ट्र शासन निर्णय परिपत्रकानुसार दि.24/08/2023 रोजी सातारा जिल्हा पोलीस प्रमुख समीर शेख यांना सैनिक फेडरेशन सातारा जिल्हा यांचे वतीने निवेदन देऊन मागणी केली होती. निवेदनाची दखल घेऊन जिल्हा पोलीस प्रमुख यांनी दि. 5/1/2024 रोजी परिपत्रक काढून जिल्हास्तरीय समिती गठित केली आहे. या समिती मध्ये सर्व 11 तालुक्यातील माजी सैनिक सदस्य म्हणून निवड करण्यात आली आहे.
जिल्हा पोलीस अधीक्षक हे समिती अध्यक्ष असतील तर जिल्ह्याचे अतिरिक्त जिल्हाधिकारी – जिल्ह्याचे सैनिक कल्याण अधिकारी,एक महिला पोलीस अधिकारी , जिल्ह्यातील प्रत्येक तालुक्यातील एक माजी सैनिक हे सदस्य असतील.
समितीच्या कामकाजाचे स्वरूप
1) सदर समिती सैनिकांच्या कुटुंबीयांना भेटून त्यांच्या तक्रारी बाबतचा आढावा घेईल
2) जिल्ह्यातील सैनिकांच्या पत्नीचे किंवा माजी सैनिकांच्या विधवा पत्नीचे तिच्यावर अन्याय झाल्याची तक्रार पोलीस स्टेशनमध्ये केल्यास त्याची तात्काळ दखल घेऊन प्रचलित कायद्यानुसार कारवाई करण्यात येईल.
3) जिल्हा सैनिक कल्याण अधिकारी दर महिन्याला तालुक्याला भेट देऊन सैनिकाच्या कुटुंबावरील अन्याय अत्याचाराची माहिती घेतील.
जिल्ह्याच्या ठिकाणी संरक्षण समिती गठित झाल्यामुळे जिल्ह्यातील सर्व आजी-माजी सैनिक,त्यांचे कुटुंबीय,शहीद जवान कुटुंबीय यांनी याबाबत समाधान व्यक्त केले आहे.
